كرهتينى
كرهتينى وانا طول عمرى مجنونك ومسكينك
وعايش فى زنازين إل وكلينك وماسكينك, وساكت
بس يا سمرا على عينى أعيش تانى فى نور خافت
أقول ياله,مهى الفتنة لونامت, هعيش فيكى تضمينى
لكن ,,,,,ضباب الفعل خلانى أحس إن إنتى كرهانى
ألاقى الحب مش ظاهرفأتظاهر تلومينى, وفى الظاهر تراضينى ,
ولما أسكت بتدينى , على دماغى على عينى ,,,,,,,,,,,,,,,
كرهت عشانك الأيام وشهورها وأبطالى
بقى يوليو يفكرنى, واكتوبر يحسرنى, وجالى ستة إبريل
كرهت عشانك العسكر ,كرهت عشانك المنصر,
وفاضل أكره الدنيا مع الدينى وأقولك أوعى عدينى
ولا تبصى على ظهرى تنادينى, عشان مس هسمع , كلام معسول يهدينى
وجرحى كل يوم ينزف ومين يدبح شراينى ومين يدبح شرايينى
ياست الناس تعبت خلاص ونفسى أرسى ,رسينى
مش العسكر حمونا ملى متكبر ومستثمر, وقلنا ياشعب لا تخبط ولاتكسر
وعيش فى سلام, هتنسى كل أوجاعك مع الأيام.............
ألاقى الكل يوجعنى ,يجوعنى,ولا يفسر, يقلى بيان يصدعنى ولايغير
يروح لوثيقة مشبوهة ومكتوبة بناب أصفر
وسايب كل برصاتى ,وآآآهاتى وسايب حالى مدمر, دا حتى كمان مشى وياهم الأزهر
يارب أستر,
أحس أزاى بحبك يلى حبانى , ونفس
الفعل والأفكار مهجمانى
أقلك, ياله طفى النور وشيلى النت والمحمول وحاصرينى
مفيش غيره ميدان تحرير بيأوينى, مفيش غيره يوصل صوتى للسامعنى وعامل إنه
ناسينى, مفيش غيره يقول للناس أنا منداس وطالع فى البلدعينى
وطالع فى الهوى عينى, .......................
كرهتينى عشان غلبان مليش عنوان وتايه فى ميادينك
أنا نفسى أروح للنيل بحمل تقيل ويحكم ما بينى وبينك
وسامحينى علا صوتى عشان تعبان, وكل وعودى فى سكوتى,
دا كان ياماكان,
أنا مش عايز أصور فى ميدانك ,ولا عايز أنام فى الطل قدامك
أنا نفسى أحس بحضنك الدافى, أحس بايدك على خدى, تقول للدمع متعدى
وتنقص من رضا ولدى واحس بحبك الصافى,أنانفسى تقولى لأخويا داولدى, أخوك
يالى الشطان غلبك, وحتى لوكرهتينى عشان ردى
فسامحينى عشان
ابنك
أنا ماشى وسايب صرختى وصوتى, وهسكت لو كان رضاكى فى سكوتى
وخايف يامى تنسينى, ويبقى رضاكى فى موتى ويبقى رضاكى فى موتى.
ليست هناك تعليقات:
إرسال تعليق